Beint í efniLandsvirkjun

Stækkun Þeistareykjastöðvar

Stækkun Þeistareykjastöðvar með þriðju vélasamstæðunni er næsti áfangi í uppbyggingu og þróun jarðhitanýtingar á Þeistareykjum.

Stækkun Þeistareykjastöðvar

Sjá meira um Þeistareykjastöð

Þeistareykjastöð var frá upphafi skipulögð sem virkjun í áföngum. Núverandi stöð er með tvær vélasamstæður og uppsett afl 90 MW, en í upphaflegu umhverfismati var gert ráð fyrir allt að 200 MW jarðvarmavirkjun á svæðinu. Við stækkun núna verður þriðju vélasamstæðunni bætt við sem reiknað er með að verði 45 MW. Hún mun styðja enn frekar við hlutverk Þeistareykjastöðvar sem einnar af lykiljarðvarmavirkjunum landsins.

Verkefnið byggir á þeirri reynslu sem fengist hefur af rekstri stöðvarinnar frá gangsetningu fyrstu tveggja vélasamstæðnanna árin 2017 og 2018, sem og á rannsóknum og vöktun sem staðið hafa yfir á svæðinu um árabil. Markmiðið er að auka raforkuvinnslu á Þeistareykjum með ábyrgri og sjálfbærri nýtingu auðlindarinnar, bæta orkunýtni og styðja við áframhaldandi verðmætasköpun úr jarðhita á svæðinu.

  • Áætlað er að framkvæmdir hefjist á fyrri hluta árs 2028
  • Stefnt er að gangsetningu fyrir lok árs 2031
Tölvugerð mynd sem sýnir hvernig Þeistareykjastöð gæti litið út eftir fulla stækkun með fjórum vélasamstæðum.

Spurt og svarað

Hér fyrir neðan eru helstu spurningar og svör um stækkun Þeistareykjastöðvar.

Ef þú finnur ekki svar við því sem þú vilt vita eða finnst einhverjar spurningar vanta á síðuna getur þú sent okkur fyrirspurn.

Almennt um stækkunina

  • Þriðju vélasamstæðunni verður bætt við þær tvær sem fyrir eru. Markmiðið er að auka raforkuvinnslu, bæta nýtingu auðlindarinnar og þróa vinnslurás stöðvarinnar áfram á grunni þeirrar reynslu sem fengist hefur af rekstri hennar frá árinu 2017.

  • Uppsett afl Þeistareykjastöðvarstöðvar fer úr 90 MW í 160 MW með þriðju vélinni og toppvélinni.

  • Við höfum öðlast góða reynslu af rekstrinum, niðurstöður rannsókna hafa styrkt forsendur verkefnisins og við teljum að auðlindin geti staðið undir aukinni vinnslu. Með varfærinni uppbyggingu er hægt að auka raforkuvinnslu og bæta nýtingu jarðhitans.

Leyfismál og framkvæmd

  • Nýtingarleyfi fyrir jarðhita var gefið út í júní 2025 og sótt hefur verið um virkjunarleyfi fyrir stækkun stöðvarinnar.

  • Já. Gildandi skipulagsáætlanir gera ráð fyrir tæplega 210 MW jarðvarmavirkjun á Þeistareykjum. Fyrirhuguð stækkun er innan þess ramma.

  • Grunnforsendur uppbyggingarinnar byggja á eldra umhverfismati fyrir allt að 200 MW virkjun á svæðinu. Jafnframt hefur Skipulagsstofnun fjallað um tilteknar breytingar sem tengjast verkefninu, þar á meðal vatnstöku, og hagnýtingu toppþrýstings og komist að þeirri niðurstöðu að þær breytingar séu ekki matsskyldar.

Auðlind og nýting

  • Stækkunin byggir á áframhaldandi rannsóknum, líkanreikningum og vöktun á viðbrögðum auðlindarinnar. Markmiðið er að auka vinnslu innan þeirra marka sem auðlindin þolir og tryggja að þróun hitastigs, þrýstings, grunnvatns og efnafræðilegs ástands sé vaktað og metið reglulega.

  • Samkvæmt umsókn um rýmkun nýtingarleyfis er sótt um að auka verga frumorku úr 19 í allt að 28,5 PJ á ári og verga massatöku úr 10 í allt að 15 Tg á ári. Fyrirtækið tekur þó ekki meira magn en þörf er á hverju sinni.

  • Með stækkuninni er stefnt að bættri frumorkunýtni og betri heildarnýtingu auðlindarinnar. Áhersla er lögð á að samræma vinnslu, skil á jarðhitavökva og þróun vinnslurásar þannig að meira fáist út úr hverri einingu sem tekin er upp úr jörðu.

Umhverfi og rannsóknir

  • Frá gangsetningu stöðvarinnar höfum við fylgst með þrýstingi og hitastigi í mæliholum, stundað skjálfta- og yfirborðsvöktun, safnað rekstrargögnum og unnið ítarleg líkön af jarðhitakerfinu með vinnsluspám fyrir stækkun stöðvarinnar.

    Niðurstöður rannsókna og líkanreikninga benda til þess að auðlindin þoli fyrirhugaða vinnsluaukningu vel. Vísbendingar eru einnig um að jarðhitageymirinn sé stærri en áður hafði verið staðfest. Áfram verður lögð áhersla á að nýta ekki meira af auðlindinni en þörf krefur hverju sinni.

  • Verkefnið byggir á vöktun grunnvatns og mati á áhrifum á nærliggjandi vatnshlot. Skipulagsstofnun hefur lagt áherslu á áframhaldandi vöktun og Umhverfisstofnun hefur talið þá ráðstöfun fullnægjandi til að styðja við markmið um góða stöðu vatnshlota til langs tíma.

  • Á Þeistareykjum er reglubundin skjálfta- og InSAR-vöktun. Gögn sem vísað er til í umsóknargögnum benda til að skjálftavirkni á svæðinu sé náttúruleg að uppruna og að landsig á svæðinu sé lítið og mælist í millimetrum á ári.