Blanda af há- og lágþrýstingsgufu
Kröflustöð er jarðvarmastöð sem nýtir blöndu af há- og lágþrýstigufu til að knýja tvo 30 megavatta hverfla. Uppsett afl stöðvarinnar er því 60 megavött og getur hún unnið 500 gígavattstundir af rafmagni á ári.
Íslenska ríkið reisti Kröflustöð og hófust framkvæmdir árið 1974 með tilraunaborunum. Borun á vinnsluholum og bygging stöðvarhúss hófust sumarið 1975. Sama ár hófust miklar jarðhræringar á svæðinu og enduðu þær með eldgosi í desembermánuði, en það var upphaf eldgosahrinu sem stóð allt til ársins 1984. Saga Kröflustöðvar er því samofin sögu Kröfluelda sem höfðu mikil áhrif á upphafsárum stöðvarinnar. Fyrri vélasamstæða stöðvarinnar var gangsett í ágúst 1977, en vegna gufuskorts hófst vinnsla rafmagns ekki fyrr en í febrúar 1978.
Árið 1996 hófst uppsetning seinni vélasamstæðu stöðvarinnar og náði hún fullum afköstum árið 1999. Síðan þá hefur Kröflustöð starfað með tveimur vélasamstæðum og 60 megavatta uppsettu afli.
