Gufustöðin

Gufustöðin í Bjarnarflagi í Mývatnssveit er elsta jarðvarmastöð landsins og á meðal þeirra fyrstu í heimi. Laxárvirkjun lét byggja stöðina sem var gangsett árið 1969. Landsvirkjun eignaðist Gufustöðina við sameiningu fyrirtækjanna árið 1983. Afl stöðvarinnar nú er fimm megavött og orkuvinnslugetan 42 gígavattstundir á ári. Stöðin nýtir gufu jarðhitasvæðisins við Námafjall.

Vélbúnaður Gufustöðvarinnar var endurnýjaður árið 2019 og var þá gamli hverfillinn fjarlægður eftir áratuga rekstur, en hann hafði upphaflega verið tekinn í notkun í sykurverksmiðju í Bretlandi árið 1934.

Jarðhitinn í Bjarnarflagi er ekki aðeins nýttur til rafmagnsframleiðslu, heldur eru mörg dæmi um fjölnýtingu hans í nágrenninu. Dæmi um starfsemi sem nýtir jarðvarmann með fjölbreyttum hætti eru Jarðböðin við Mývatn, Léttsteypan, Mýsköpun og Hitaveitan í Mývatnssveit, auk þess sem jarðvarminn hefur verið nýttur til brauðbaksturs um langan tíma.