Vorleysingar fylla Blöndulón
Óvenjuleg hlýindi á hálendinu undanfarið hafa leyst nánast allan snjó á neðra vatnasviði Blöndulóns. Allar líkur eru á að þessar vorleysingar nái að fylla Blöndulón og eitthvað vatn muni renna á yfirfalli þess.
Í vetur var einungis um 40% af forðanum í lóninu nýttur og því stóð lónið óvenjulega hátt í upphafi vorflóða. Ýmsar ástæður liggja þar að baki, orkusala á Norðurlandi hefur dregist saman og flutningstakmarkanir gera það að verkum að ekki er hægt að keyra Blöndustöð á fullum afköstum. Þá hefur viðhald hjá Landsneti á byggðalínu og hjá Landsvirkjun í Blöndustöð verið meira en venjulega.
Nýliðinn vetur var óvenjulegur þar sem hlýrra hefur verið á hálendinu en undanfarin ár. Rennsli til Blöndulóns byrjaði að aukast í febrúar og miklar vorleysingar í apríl og nú aftur í maí hafa nánast fyllt lónið. Á sama tíma hefur nánast allan snjó tekið upp í kringum Blöndulón.
Í gegnum tíðina hefur þetta ekki verið algengt, en kom fyrir í byrjun aldarinnar. Þegar horft er fram í tímann er líklegasta sviðsmyndin sú að lónið fari á yfirfall núna en það muni síðan standa í stað eða lækka fram að upphafi jökulbráðar í júlí. Í sögunni hefur það verið þróunin, og í framhaldinu hefur lónið ekki fyllst fyrr en í byrjun ágúst.
