Framkvæmdir í Fremri Kárahnjúk sumarið 2023

Landsvirkjun mun í sumar standa fyrir framkvæmdum í Fremri Kárahnjúk og munu þær hefjast föstudaginn 23. júní nk. og áætluð verklok eru föstudaginn 25. ágúst nk.

Verkið felur í sér að endurnýja hrunvarnagirðingu sem stendur ofan við veginn í Fremri Kárahnjúk.

Á verktímanum mun verða nauðsynlegt að loka veginum vegna hættu á grjóthruni og einnig vegna þess að stór krani mun þurfa að standa á veginum. Meginþungi nauðsynlegra lokana verður í fyrstu og síðustu viku framkvæmdanna en að auki mun verða nauðsynlegt að loka eitthvað á öðrum tímum framkvæmdarinnar. Veginum verður lokað annars vegar við inntakið á milli Desjarárstíflu og Kárahnjúkastíflu og hins vegar við norðurenda Kárahnjúkastíflu, ekki er hjáleið á leiðinni á þessum tíma.

Reynt verður að stilla lokunum í hóf en öryggi starfsfólks og vegfarenda verður haft í forgangi. Á fyrsta degi framkvæmdanna 23. júní 2023 verður umferð stýrt í gegnum svæðið frá 10-16 en ekki er búist við neinum umferðartöfum þann dag.

Miðað er við að hafa lokað frá kl. 7 til 19 þá daga sem loka þarf en hafa opnanir til að hleypa umferð í gegn á tímunum:

• 10.00 – 10.15
• 13.00 – 13.15
• 16.00 – 16.15

Sett verða upp skilti niður í Fljótsdal við Bessastaði og á Fiskidalshálsi á Brúardalaleið til upplýsinga um lokanirnar og tímasetningar. Áætlaðar lokanir verða auglýstar í staðarmiðlum, í útvarpi, á vef Landsvirkjunar og á vef Vegagerðarinnar.