Flutningum á fyrstu 14 vindmyllunum lokið

Verkefnið var umfangsmikið og kallaði á vandaðan undirbúning, vegbætur á völdum stöðum og náið samstarf fjölmargra aðila. Meðal þess sem flutt var voru turnhlutar, vélarhús, rafalar og tæplega 69 metra langir vindmylluspaðar. Einnig var safnstöðvarspennir Vaðölduvers fluttur frá Þorlákshöfn að framkvæmdasvæðinu eftir sömu flutningsleið.

ET þungaflutningar og Bergen Spesial Transport önnuðust flutningana fyrir Enercon, framleiðanda vindmyllanna. Samstarf þeirra við lögreglu, Vegagerðina, sveitarfélög á áhrifasvæði flutningsleiðarinnar, Landsvirkjun og aðra sem komu að verkefninu gekk vel.

Landsvirkjun þakkar öllum sem komu að undirbúningi og framkvæmd flutninganna fyrir gott samstarf. Íbúar og aðrir vegfarendur fá sérstakar þakkir fyrir tillitssemi og þolinmæði á meðan flutningunum stóð.

Uppsetning fyrstu 14 vindmyllanna stendur nú yfir á framkvæmdasvæðinu við Vaðöldu. Þar verður unnið áfram að uppsetningu og frágangi fyrstu 14 vindmyllanna, samhliða öðrum framkvæmdum á svæðinu.

Vaðölduver verður byggt upp í tveimur áföngum og verða alls 28 vindmyllur reistar. Fyrri áfanginn tekur til þeirra 14 vindmylla sem nú hafa verið fluttar á svæðið. Næsta vor hefjast síðan flutningar á íhlutum 14 vindmylla til viðbótar að Vaðölduveri og markar það upphaf seinni áfanga verkefnisins.

Þau sem vilja kynna sér framkvæmdirnar geta komið við á útsýnis- og áningarstað sunnan við Vaðölduver og Sprengisandsleið. Þar eru bílastæði, stutt gönguleið að útsýnissvæði og upplýsingaskilti um verkefnið. Frá staðnum er gott útsýni yfir vindmyllurnar og framkvæmdasvæðið. Gert er ráð fyrir áningarstaðnum í deiliskipulagi Vaðölduvers.

Staðsetning með Google Maps hlekk: Smelltu hér