Samsetningu fyrstu heilu vindmyllunnar í Vaðölduveri lauk í gær, 1. júní 2026, og þar með náðist mikilvægur áfangi í uppbyggingu vindorkuversins.
Vindmyllurnar í Vaðölduveri eru af gerðinni ENERCON E-138 EP3 E3 og er uppsett afl hverrar vindmyllu 4,26 MW. Um er að ræða vindmyllur með 138 metra þvermál spaðahrings og um 150 metra heildarhæð þegar spaði er í efstu stöðu.
Alls verða vindmyllurnar í Vaðölduveri 28 talsins. Fyrsta heila vindmyllan er nú komin á sinn stað og verður uppsetningu hinna 27 fram haldið í áföngum. Stefnt er að því að uppsetningu allra vindmyllna í Vaðölduveri ljúki fyrir lok árs 2027.
Hver vindmylla er sett saman úr fjölda stórra og þungra íhluta. Turninn er settur saman úr þremur einingum. Neðsta turneiningin og miðjueiningin vega hvor um 69 tonn en efsta einingin tæp 60 tonn. Saman mynda þær burðarvirkið sem vélbúnaður vindmyllunnar hvílir á.
Efst á turninum er vélarhúsið, sem vegur 71 tonn með spenni. Þar er stór hluti raf- og stýribúnaðar vindmyllunnar. Við vélarhúsið tengist naf vindmyllunnar, um 40 tonn að þyngd, sem heldur utan um tengingu spaðanna þriggja við vélbúnaðinn. Hver spaði er tæplega 69 metra langur og vegur tæp 24 tonn.
Rafallinn er sá hluti vindmyllunnar sem breytir snúningsorku í raforku. Vindurinn snýr spöðunum, spaðarnir snúa nafinu og rafallinn framleiðir rafmagn. Rafallinn er settur saman úr stórum einingum, þar á meðal um 45 tonna miðhluta rafalarótors, tveimur 38 tonna hálfmánum sáturs rafala og tveimur 9,5 tonna hálfmánum rafalarótors.
Vindmyllurnar eru merki um sýnileg tímamót á framkvæmdasvæðinu. Samanlagt vegur vélbúnaður einnar vindmyllu um 350 tonn. Vindmyllurnar verða um 150 metrar á hæð þegar spaðar eru í efstu stöðu.
