Landsvirkjun gefur út græn skuldabréf að fjárhæð 220 milljónir bandaríkjadala

Landsvirkjun gaf í dag út græn skuldabréf á bandarískum skuldabréfamarkaði að fjárhæð 220 milljónir bandaríkjadala, sem samsvarar um 27 milljörðum íslenskra króna.

Upphaflega var stefnt að útgáfu að fjárhæð 180 milljónir bandaríkjadala, en mikill áhugi fjárfesta leiddi til þess að útboðið var stækkað í 220 milljónir. Eftirspurn var rúmlega fjórföld, sem endurspeglar traust fjárfesta til Landsvirkjunar og sterka fjárhagslega stöðu fyrirtækisins.

Skuldabréfin eru gefin út í tveimur flokkum til sex og átta ára. Skuldabréfin eru annars vegar með föstum vöxtum, 5,33% sem jafngildir 115 punkta álagi á bandarísk ríkisskuldabréf og hins vegar með fljótandi vöxtum sem miðast við SOFR vexti með 169 punkta álagi.

Útgáfan er græn og gefin út innan græns fjármögnunarramma Landsvirkjunar í samræmi við áherslur fyrirtækisins í sjálfbærni- og loftslagsmálum. BNP Paribas og Rabobank voru umsjónaraðilar útgáfunnar.

Fjármagnið verður nýtt til virkjanaframkvæmda Landsvirkjunar, meðal annars við Vaðölduver.

Vaðölduver er fyrsta vindorkuver landsins. Þar rísa alls 28 vindmyllur og er uppsett afl 120 MW. Framkvæmdir eru hafnar og gert er ráð fyrir að fyrstu 14 vindmyllurnar verði gangsettar í haust og hinar seinni árið 2027, þannig að Vaðölduver verði komið í fullan rekstur fyrir lok árs 2027.

Framkvæmdir við Vaðölduver.