Ný stjórnstöð Landsvirkjunar

Ný stjórnstöð Landsvirkjunar hefur verið tekin formlega í notkun. Stjórnstöðin vaktar öll mannvirki og búnað Landsvirkjunar og stýrir aflstöðvum fyrirtækisins. Stjórnstöðin er í höfuðstöðvum Landsvirkjunar í Katrínartúni í Reykjavík og varastjórnstöð er við Írafoss.

Vöktun og stýring aflstöðva Landsvirkjunar var um árabil í höndum Landsnets en það fyrirkomulag sætti eðlilega gagnrýni hin síðari ár í ljósi samkeppni á raforkumarkaði. Fyrir um þremur árum ákvað Landsvirkjun að byggja upp eigin stjórnstöð frá grunni, en það var bæði flókið og umfangsmikið verkefni. Nú er uppsetningu alls búnaðar lokið, starfsfólk hefur fengið fullnægjandi þjálfun og nokkurra vikna reynsla er komin á rekstur stjórnstöðvarinnar.

„Í stóru vatnsaflskerfi eins og Landsvirkjun rekur er stýring og nýting vatns gríðarlega mikilvæg. Við hjá Landsvirkjun teljum okkur geta náð enn betri árangri með eigin stjórnstöð og með aukinni vöktun teljum við t.d. að stífluöryggi aukist enn frekar. Þegar Vaðölduver tekur til starfa, fyrsta vindorkuver landsins, verður þessi stýring kerfisins enn kvikari og mikilvægari,“ sagði Gunnar Guðni Tómasson, framkvæmdastjóri Vatnsafls hjá Landsvirkjun þegar stöðin var formlega opnuð miðvikudaginn 25. nóvember.

Eigin stjórnstöð gerir Landsvirkjun einnig kleift að auka þjónustu við aflstöðvasvæði fyrirtækisins og með aukinni miðlægri vöktun skapast tækifæri til að draga úr vöktun á aflstöðvunum.

Landsvirkjun þakkar Landsneti gott samstarf á liðnum árum. Vöktun og stýring aflstöðva okkar var þar í öruggum höndum en við fögnum því að hafa komið upp nýrri stjórnstöð og ná jafnframt að auka vöktun og þjónustu við aflstöðvarnar.