RST Net sér Vaðölduveri fyrir rafbúnaði

16.09.2025Búrfellslundur, Vaðölduver

Landsvirkjun hefur samið við RST Net ehf. um hönnun, innkaup, framleiðslu og uppsetningu á rafbúnaði í safnstöð á framkvæmdasvæði fyrirhugaðs vindorkuvers við Vaðöldu. Samningurinn nemur rúmum 450 milljónum króna og var tilboð RST Net metið hagstæðast af fjórum sem bárust.

Á myndinni fagna samningnum þau Sigurgeir B. Geirsson, yfirverkefnastjóri Vaðölduvers, Ásbjörg Kristinsdóttir, framkvæmdastjóri framkvæmda, Steinn Ágúst Steinsson, sérfræðingur í þróun vindorku, Sigmundur Jónsson, framkvæmdastjóri RST Net, Bergsteinn Daníelsson, verkefnisstjóri hjá RST Net og Sigrún Elva Reynisdóttir, sérfræðingur hjá Landsvirkjun.

Hönnun, innkaup og framleiðsla hefst nú þegar

Sjá á vef Vaðölduvers

RST Net mun hefja hönnun, innkaup og framleiðslu nú þegar en áætlað er að framkvæmdir á verkstað hefjist á næsta ári. Verkinu fylgir uppsetning á rafbúnaði í safnstöð sem tengist vindmyllum versins og er stefnt að því að ljúka verkinu síðla árs 2027.

Helstu verkþættir samningsins fela í sér útvegun og uppsetningu á 33 kV og 11 kV dreifingu ásamt stöðvarnotkunarspennum. Þá verður smíðuð og sett upp 400 V aðaldreifing og tvær jafnstraumsdreifingar. RST Net sér einnig um útvegun, forritun og uppsetningu á stjórn- og varnarbúnaði, auk eftirlits, tenginga og frágangs á 33 kV og 11 kV strengjum. Loks felur samningurinn í sér útvegun og uppsetningu á 220 kV gegnumtökum ásamt ýmsum auka- og viðbótarverkum.

„Þetta er stór áfangi í uppbyggingu Vaðölduvers,“ segir Sigurgeir B. Geirsson, yfirverkefnisstjóri Vaðölduvers. „Við erum afar ánægð með að semja við íslenskt fyrirtæki sem hefur mikla þekkingu og reynslu á þessu sviði. Með þessu tryggjum við öflugan rafbúnað sem mun nýtast til að tengja vindorkuna við raforkukerfið og styðja þannig orkuskipti framtíðarinnar.“