Stefnt á skammtímamarkað á næsta ári

Landsvirkjun reiknar með því að hefja sölu skammtímaorku á markaðstorgum raforku fyrir lok fyrsta ársfjórðungs 2026. Mikil og ör þróun er nú á umgjörð skammtímamarkaðar raforku, en skýr umgjörð um markaðinn mun styrkja virkni hans.

Orkufyrirtæki þjóðarinnar tilkynnti í júlí sl. að það áformaði sölu skammtímaorku á markaðstorgum Vonarskarðs og Elmu frá hausti 2025, en fram að þessu hefur Landsvirkjun selt skammtímaorku á eigin viðskiptavef. Þessum áformum hefur nú verið frestað en engu að síður vinnur Landsvirkjun áfram að undirbúningi þátttöku.

Frumvarp til laga um raforkuviðskipti var ekki samþykkt á vorþingi líkt og til stóð, en nú liggur fyrir Alþingi nýtt frumvarp. Í því eru settar fram hátternisreglur fyrir aðila markaðarins og upplýsingaskylda þeirra gagnvart honum skilgreind. Þá hefur Raforkueftirlitið kynnt áætlun um gerð leiðbeininga fyrir þátttakendur á raforkumarkaði og er gert ráð fyrir að sú vinna komist nokkuð langt á fyrsta ársfjórðungi 2026. Skýr lagaumgjörð og kröfur á þátttakendur munu styrkja grundvöll raforkumarkaðar og virkni hans, en mikil og ör þróun er nú á umgjörð skammtímamarkaðar.

Sala á aflþjónustu hefur verið endurskoðuð samhliða áformum um þátttöku á skammtímamörkuðum. Landsvirkjun mun bjóða viðskiptavinum sínum upp á að gera aflþjónustusamninga út árið 2025 og verður hægt að gera samninga sem gilda út árið 2026. Ekki eru áform um að framlengja sölutímabilið.