Vindorkan hentar vel í samspili við vatnsafl

Vordís sagði vindorku eiga fullt erindi inn í íslenska orkukerfið, en mikilvægt væri að uppbyggingin yrði skynsamleg og varfærin.

Vindorka og vatnsafl geta unnið sérstaklega vel saman. Þegar vindurinn framleiðir raforku er hægt að draga úr vatnsnotkun í vatnsaflsvirkjunum og varðveita vatn í miðlunarlónum til síðari nota. Vordís líkti þessu við hleðslu á rafhlöðu þar sem lónin gegna í raun hlutverki geymslu.

Samspilið er einnig hagstætt yfir árið. Vindorka skilar almennt meiri vinnslu yfir vetrarmánuðina, á sama tíma og innrennsli í miðlunarlón vatnsaflsvirkjana er minna.

Myndin sýnir hvernig vindorka og vatnsafl geta unnið saman yfir árið. Nýtni vindorku er almennt mest yfir vetrarmánuðina þegar innrennsli í miðlunarlón er minna, en innrennsli nær hámarki yfir sumarið þegar vindorkan skilar minna.

Orkan sem framleidd verður í Vaðölduveri fer inn á almenna raforkukerfið en er ekki ætluð tilteknum stórnotanda. Hún verður þannig hluti af heildarorkuframboði kerfisins og getur meðal annars stuðlað að betri nýtingu vatnsafls.

Vaðölduver er á Suðurlandi þar sem eftirspurn eftir raforku er mikil. Á svæðinu eru jafnframt fyrir mikilvægir innviðir, meðal annars vegir, tengivirki og flutningslínur, sem skiptir verulegu máli við staðsetningu vindorkuvers.

Vordís sagði skýrari stefnu stjórnvalda í vindorkumálum vera heillaskref. Við áframhaldandi uppbyggingu þurfi meðal annars að huga að framboði á jöfnunarafli, getu flutningskerfisins og því að vindorkuver séu staðsett þar sem aðstæður eru góðar.

Einnig sé mikilvægt að uppbygging fari fram í góðri sátt við nærsamfélög og í samspili við Landsnet, sem rekur flutningskerfi raforku.

Landsvirkjun lítur jafnframt á Vaðölduver sem mikilvægt skref í að byggja upp þekkingu og reynslu af rekstri vindorku við íslenskar aðstæður.