Virkjunarleyfi Hvammsvirkjunar óhaggað

Landsvirkjun var sýknuð af öllum kröfum stefnenda í máli sem höfðað var til að freista þess að ógilda enn á ný virkjunarleyfi Hvammsvirkjunar í Þjórsá. Hið sama á við um aðra þá sem stefnt var í málinu, þ.e. íslenska ríkið o.fl.

Mál þetta er eitt af nær fimmtíu kærumálum af ýmsum toga sem komið hafa fram í tengslum við byggingu Hvammsvirkjunar. Flest kærumálin hafa byggst á athugasemdum við formhlið málsins, t.d. málsmeðferð í stjórnsýslunni, mistök við lagasetningu o.fl. Kröfur um ógildingu leyfa hafa sjaldnast byggt á efnishlið málsins, þ.e. um Hvammsvirkjun sjálfa, hönnun hennar og efnislegar áætlanir. Dómurinn staðfestir einnig að vinna við undirbúning Hvammsvirkjunar hafi verið fagleg bæði af hálfu Landsvirkjunar og stjórnvalda og að fullnægjandi rannsóknir hafi farið fram í aðdraganda leyfisveitingar.

Í desember sl. veitti Umhverfis- og orkustofnun nýtt virkjunarleyfi fyrir Hvammsvirkjun, á grundvelli nýrra laga. Fyrra leyfið hafði verið fellt úr gildi með dómi Hæstaréttar 9. júlí 2025 vegna mistaka löggjafans við lagasetningu. Landeigendur höfðuðu mál til ógildingar nýja virkjunarleyfisins. Þá vildu þeir einnig að úrskurður um umhverfismat Hvammsvirkjunar frá 2018 yrði ógiltur.

Skemmst er frá því að segja að öllum kröfum stefnenda í málinu var hafnað.

Hartnær aldarfjórðungur er frá því að fyrst var hugað að virkjun við Hvamm. Framkvæmdir við Hvammsvirkjun sækjast nú vel og miðað er við að virkjunin verði gangsett árið 2030.

Skoðanakannanir hafa sýnt að almenningur styður Hvammsvirkjun. Í könnun Maskínu í september sl. voru um 60% hlynnt henni en aðeins rúmur fimmtungur andsnúinn.

Markmið orkufyrirtækis þjóðarinnar verður, hér eftir sem hingað til, að hámarka verðmæti þeirra endurnýjanlegu orkulinda sem fyrirtækinu er trúað fyrir, með sjálfbærni og hagkvæmni að leiðarljósi.