E-Ship 1 komið til Þorlákshafnar

Hingað til hafa borist hlutar sem nema einni og hálfri vindmyllu í hverri skipaferð, en ENERCON E-Ship 1 er ekkert venjulegt flutningaskip. Það er sérstaklega hannað til að flytja stóra vindmylluhluta og getur því flutt fjórar í einu.

Flettner-rótorarnir fjórir á E-Ship 1 aðstoða við að knýja skipið áfram

Á þilfarinu eru fjórir, háir Flettner-rótorar, sem nýta vindorku til að aðstoða við að knýja skipið áfram. Tæknin byggir á svokölluðum Magnus-áhrifum þar sem snúningssívalningar skapa kraft sem styður við siglinguna. Fyrir vikið notar skipið allt að fjórðungi minni olíu en skip af sambærilegri stærð.

Komu skipsins fylgir áframhaldandi uppbygging Vaðölduvers, en flutningar á vindmylluhlutum frá Þorlákshöfn að framkvæmdasvæðinu hafa staðið yfir frá því í byrjun maí.

Byrjað er að reisa fyrstu vindmyllurnar og verða fyrri fjórtán þeirra farnar að vinna raforku inn á flutningskerfið í haust. Seinni helmingurinn verður settur upp á næsta ári og verður Vaðölduver komið í fullan rekstur seinni hluta árs 2027.