Losun vegna orkuvinnslu dróst saman
Losun vegna orkuvinnslu Landsvirkjunar var 3,1 gCO2-íg/kWst árið 2025 (losun á hverja unna kílóvattstund) og er áfram með því minnsta sem þekkist innan orkugeirans. Losunin dróst saman á milli ára, einkum vegna minni orkuvinnslu jarðvarmastöðva. Óbein losun í umfangi 3 jókst hins vegar, vegna aukinna umsvifa í framkvæmdaverkefnum. Þetta kemur fram í loftslagsbókhaldi Landsvirkjunar fyrir árið 2025.
Losun frá jarðvarmastöðvum minnkaði um 18% milli ára, að mestu vegna minni orkuvinnslu í kjölfar rekstrarerfiðleika PCC á Bakka. Losun jarðvarma á orkueiningu dróst lítillega saman. Losun frá lónum jókst um 16% frá fyrra ári. Veðurfar hefur áhrif á þá losun og eykst hún eftir því sem íslausum dögum fjölgar.
Heildarlosun vegna starfseminnar jókst um 10%, sem má rekja til framkvæmda við Vaðölduver og Hvammsvirkjun. Heildarlosun á orkueiningu var 5,8 gCO2-íg/kWst og er hún áfram undir viðmiði Science Based Targets Initiative um kolefnishlutleysi orkufyrirtækja (9,1 gCO2-íg/kWst). Orkufyrirtæki geta talist kolefnishlutlaus ef losun er undir þessu viðmiði, kaupi þau kolefniseiningar fyrir þeirri losun sem eftir stendur.
Þess má vænta að losun aukist enn frekar á komandi árum vegna fyrrnefndra verkefna, auk stækkunar Sigöldustöðvar og uppsetningar toppvélar á Þeistareykjum. Landsvirkjun leggur áherslu á að koma í veg fyrir losun vegna framkvæmdaverkefna eins og kostur er bæði á hönnunar- og framkvæmdatíma. Við beitum m.a. innra kolefnisverði í útboðum til að hvetja verktaka til að draga úr losun vegna eldsneytisnotkunar og velja efni með litlu kolefnisspori.
